सपना के टुकना, चंगेरी लाइस नवा अंजोर

48 बछर के अस्मिना अपन संग काम करेइय्या जुबैदा के संग अपन वो बखत ला सुरता करत हँसे लागथे जब वो मन गहूँ के काड़ी (पैरा) जेन ला ओकर मन के महतारी मन फेंक देवत रहिन, ओकर ले नान-नान टुकना बनाय रहिन. मेवात इलाका के अधिकतर नोनी मन के जइसने, वो ह घलो बुने सीखे रहिस काबर के महतारी मन जोर देय रहिन; वो मन कभू सोचे घलो नइ रहिन के एक दिन ये हुनर ह ओकर मन के रोजी-रोटी के जरिया बन जाही.

“हमन वोला बनावत रहेन अऊ अपन रिस्तेदार मन ला देवत रहेन. अब जब बिकन लगे तो हम ना दें फ्री में [अब जब वो ह बेचाय लगे हवय, त हमन वो मन ला फोकट मं नइ देवन],” अस्मीना हँस परथे.

हरियाणा के नूंह जिला के घसेरा गाँव मं अपन घर के दुवार मं सीमेंट के बेंच मं बइठे, वो ह देसी गेहूँ (देसी गहूँ के काड़ी) के एक हाथ-भर लंबा काड़ी(पैरा) निकारथे अऊ एक ठन बारीक सुई ले वोला पाँच हिस्सा कर देथे. वो मन ले एक हिस्सा ला धरके, वोला वो ह भारी माहिर हाथ ले तउन 'चंगेरी' (उथली टुकना) के बढ़त घेरा मं बुन देथे, जेन ला वो ह बनावत हवय.

“अगर घर में मेहमान आगो और चंगेरी में रोटी रख के ना दी, तो यूं कहेंगे कि अस्मीना ने प्लेट में रोटी धर के दी, चंगेरी में ना दी [गर पहुना घर आथें अऊ मंय चंगेरी मं रोटी नइ परोसंय, त वो मन खिसियाथें के रोटी थारी मं परोसे गीस],” अस्मीना कहिथे.

चंगेरी कतको काम अवेइय्या टुकना आय, जेन ला हरियाणा अऊ राजस्थान के मेवात इलाका के माईलोगन मन पारंपरिक रूप ले बनावत आवत हवंय. एक बखत रहिस, जब वो मन बर-बिहाव, ईद अऊ दीगर तिहार के मउका मं भेंट देय के चलन रहिस.

चंगेरी बनाय के हुनर नोनी मन बर भारी जरूरी रहिस, अऊ अक्सर बिहाव के गोठ-बात बखत येकर चरचा होवय. अस्मिना कहिथे, “नोनी के घर के लोगन मन गरब ले बतायेंव के ओकर मन के बेटी अतक चित्रा (हुनरमंद) आय के वो ह कोनो घलो किसम के चंगेरी, गुदरी [ गोदरी], धन चूल्हा [माटी के] बना सकथे.”

मंझनिया, माइलोगन मन ककरो न ककरो घर के दुवारी मं जुरथें अऊ बुनई करत गोठियावत रहिथें. वो ह सुरता करत बताथे, “एक झिन माईलोगन ह मंझा मं बइठे अपन टुकना बनावत रहय, अऊ आने मन ओकर चरों कोती बइठे, ओकर टुकना मं बने डिज़ाइन के नकल करंय.”

ओकर मन के नान-नान नोनी मन लकठाच मं रहंय अऊ खेल-खेल मं ये हुनर सीख लेवंय.

अब वो ह तइहा के बात होगे हवय. अब माईलोगन मन पहिली जइसने मंझनिया मं ककरो घर नइ जुरंय अऊ नोनी मन सीखे घलो नइ चाहंय. न त अस्मिना के बेटी अऊ न ज़ुबैदा के बेटी मन ये हुनर सीखिन. अस्मिना कहिथे,” ओ मन कहिथें के हमन ला चंगेरी के जरूरत नइ ये-रोटी राखे बर त अऊ घलो कतको बरतन हवय. वो मन सवाल करथें, “गर हमन ला चंगेरी सीखना हवय, त हमन काबर पढाई –लिखाई करेन?” अस्मिना बतावत जाथे, वो मन मोला कहिथें, ‘हमारी आज़ाद उमर है.’”

अस्मिना अब हरियाणा राज्य ग्रामीण आजीविका मिशन के तहत बरकत नांव के 12 झिन माईलोगन के एक ठन स्वयं-सहायता समूह के हिस्सा के रूप मं ये टुकना बनाथे, वो ह समूह के अध्यक्ष आय. नूंह जिला मं 2,000 स्वयं-सहायता समूह हवंय.

देस के रजधानी इलाका के हिस्सा होय के बाद घलो, नूंह देस के सबले पिछड़ा जिला आय (नीति आयोग 2018).

दूरिहा के अपन रिस्तेदार 52 बछर के ज़ुबैदा अऊ अपन ननद के संग मिलके, अस्मिना ह साल 2014 मं चंगेरी बेचे सुरु करिस. ये माईलोगन मन पर्दा बर गुदरी अऊ झालर घलो बनाथें.

एक ठन चंगेरी 1,000 ले 1,500 रूपिया के बीच बेचाथे, अऊ येला बनाय मं 10-12 दिन लाग जाथे – ये मं रोज के चार घंटा बूता करे जाथे. येकर ऑर्डर खासकरके दिल्ली अऊ मुंबई ले, मिशन के जरिया ले आथे.

फेर कुछेक बछर पहिली एक ठन अलहन के बाद अस्मिना के घरवाला अब्दुल काम करे छोड़ दीस, ते पायके अब वो ह घर के अकेल्ला कमेलिन आय, अऊ महीना मं वो ह 7,000 ले 10,000 रूपिया कमा लेथे.

ये टुकना मन कइसने घलो किसम के गहूँ काड़ी (पैरा) ले नइ बनय. अस्मिना कहिथे, “हमन एक ठन खास किसम के बउरथन-नंबर 306 धन देसी गहूँ- जेन ह बनेच कम पानी अऊ बगेर कोनो खातू के लगाय जाथे.” सही किसम के काड़ी मिले अब मुस्किल होवत जावत हवय, काबर के अधिकतर किसान अब खातू अऊ दवई (कीटनाशक) बउरे लगे हवंय; येकर ले काड़ी दुब्बर अऊ टूट जाथे, अऊ काम के लइक नइ रहि जाय.

जेठ अऊ बइसाख (मार्च अऊ अप्रैल) मं, गहूं के काड़ी (पैरा) संकेल के घर मं राख लेय जाथे. जइसनेच बरसात आथे, ये काड़ी मन ला चमक वाले रंग – लाली, पिंयर, हरियर अऊ गुलाबी सबले जियादा पसंद करे जाथे – मं रंगे जाथे अऊ हलका घाम मं सूखाय बर राख देय जाथे.

नंबर 306 बढ़िया गुन वाले देसी ग हूँ अऊ काड़ी (पैरा) आय; करीबन आधा एकड़ ले मिले येकर लागत 15,000 रूपिया आथे, अऊ येकर ले करीबन 1,000 चंगेरी बनाय जा सकथे.

असमीना कहिथे, “चौमासे के दिन में बनाएंगे तो हमारे हाथ न चिरेंगे [ गर हमन बरसा मं बनाबो त हमर हाथ नइ छिलय].’ बरसा मं काड़ी कोंवर हो जाथे अऊ वोला अपन मुताबिक बनाय अऊ बुने सुभीता हो जाथे. दीगर सीजन मं काड़ी सूक्खा अऊ नुकीला हो सकथे.

जब पारी उहाँ गे रहिस, त वो समूह ला आस्ट्रेलिया ले 200 चंगेरी के आर्डर मिले रहिस, फेर वोला बनाय बर ओकर मन करा गहूँ के काड़ी नइ रहिस. अस्मिना कहिथे, “हमन ला जतक काड़ी के जरूरत हवय, ओकर कमी हवय, काबर के भारी बरसा होय रहिस अऊ फसल बरबाद होगे रहिस.”

चंगेरी बनाय मं, दू ठन माई किसम के टांका होथे -चिरुवा अऊ आटन. चिरुवा मं, गहूं के काड़ी ला कतको लड़ी मं बांटे जाथे, जेकर धारी मं एक ठन बारीक़ अऊ कसके बुने तरीका ले बनथे. आतन मं, काड़ी ला चपटा करे जाथे, जेकर ले ये ह जियादा चाकर अऊ उभार नजर आथे; ये ला अक्सर आधार (तल्ला) बनाय बर काम मं लाय जाथे.

“बोहोत नहनो काम है [ये ह सुग्घर काम आय],” जुबैदा कहिथे.

डिज़ाइन अपन तीर-तखार के नजारा ले बनाय जाथे, जेकर आधार रोजमर्रा के जिनिस, तीर-तखार के रुख रइ अऊ फूल अऊ इहाँ तक के मेवात के माईलोगन मन के पहिरे के सोन के चोकर घलो होथे. टुकना के धारी मं खजूर के रुख, लहर अऊ पान के पत्ता के नकल अक्सर देखे बर मिलथे. येकर तल्ला मं अक्सर फिरकी, राई के फूल अऊ दिल जइसने डिज़ाइन बने होथे. खास मऊका मं, टुकना के मालिक के नांव घलो ये मं बुने जा सकथे.

अस्मीना ह एक पईत एक ठन टुकना बनाय रहिस जेकर दूनों कोती लिखाय रहिस, ‘एक रोटी खाएं, दूसरी पे हाथ न लगाएं, और धाप के खाएं [ सिरिफ एक ठन खावव, अऊ दूसर ला हाथ झन लगावव, ओकर बाद घलो पेट भरे रहय]- ये इलाका मं एक ठन आम हाना आय.

“हमन हरेक किसम के कलाकारी करथन,” वो ह हांसत कहिथे.

अस्मिना आगू बताथे, “हरेक घेरा मं हमन गिनत रहिथन के एक रंग के कतका टांका हवय – जइसने, एक ठन हरियर फूल के एक घेरा मं पांच ठन टांका हो सकत हे अऊ दूसर मं चार- अऊ हमन ला येकर चेत राखे ला परथे, नइ त जम्मो डिजाइन खइता हो जाही.”

ज़ुबैदा एक ठन टुकना उपर उठाथे, जेन ला वो ह अपन बेटी के बिहाव बर सहेज के राखे रहिस – जेन ह सात अलग अलग फूल के नमूना ले बने हवय.

फेर अब बड़े डिज़ाइन कम हवत जावत हवय. “अब सीख ही ना रही तो चंगेरी तो खतम होंगी (अब सिखेइय्याच नइ यें त चंगेरी ह नंदा जाही),” वो ह संसो करत कहिथे.

राजस्थान के अलवर जिला के तापोकरा मं पले बढ़े अस्मिना ला चंगेरी बनाय थोकन घलो नइ भावत रहिस. वो ह अपन दाई मरियम ले अक्सर कहय के वो त बस उहिच टुकना मन ला ससुराल ले जाही, जेन ला मरियम ह बनाय हवय! फेर बिहाव के बाद ओला गम होइस के ये ह एक ठन अइसने परंपरा आय जेकर ले ओकर निजात नइ ये -काबर के ओकर सास कपूरी घलो ये कला ला ओतकेच लगन अऊ मगन होके करत रहिस.

“जब मंय इहाँ [नूह] आयं, त घर अऊ परोस के हर कोनो चंगेरी बनाइन, अऊ मंय घलो मान गेंय, अस्मिना सुरता करत बताथे.

ये हुनर के काम हिंदू अऊ मुसलमान दूनोंच समाज के माइलोगन मन करत रहिन. फेर बखत के संग ये हुनर ला खास करके सिरिफ मुसलमान माईलोगन मन आगू ले गीन. “अब त सिरिफ हिंदू सियानिन मनेच ये हुनर ला जानथें,’ अस्मिना कहिथे. “हिंदू परिवार मन पढ़ लिखके ये हुनर ले दूरिहा चले गीन.”

नूंह के अधिकतर बासिंदा मेव मुसलमान आंय, जेन मन ऐतिहासिक रूप ले हिंदू सांस्कृति के रित-रिवाज ला इस्लामी आस्था के संग मिला ले हवंय.

अस्मिना के सात झिन लइका हवंय – तीन झिन बेटी अऊ चार झिन बेटा. दस बछर पहिली, ओकर सबले बड़े बेटी के बिहाव 18 बछर के उमर मं हो गे रहिस. फेर अब मंय पढ़ई-लिखई के महत्तम ला समझथों, वो ह कहिथे. ओकर दूसर बेटी ग्रेजुएशन पूरा कर ले हवय, फेर सबले छोटे बेटी 11 वीं क्लास मं हवय अऊ फुटबॉल खेलथे.

“ये बखत वो ह खेल खेले बर रोहतक मं हवय,” अस्मिना गरब ले मुचमुचावत बताथे, अऊ कहिथे के ओकर बेटी के सपना पुलिस अफसर धन फुटबॉल कोच बने के आय. “इहाँ लोगन मन के सोच बदलत हवय –अब वो मन चाहथें के लइका मन पढ़े-लिखें,” वो ह कहिथे.

ये सोच ला बदले मं अस्मिना के बड़े हाथ हवय; जब वो ह काम करे सुरु करिस, त वो ह परोसी अऊ रिस्तेदार मन के मीन-मेख निकारे ला मन मं नइ राखिस. येकर बाद वो ह अफसर मन ले बिनती करिस के गाँव के एकेच ठन नोनी मन के स्कूल ला उन्नत करके उहाँ 12 वीं क्लास तक के पढ़ई सुरु करे जाय – आज इहाँ करीबन 100 झिन नोनी मन पढ़थें.

“इहाँ लइका मन पहिली अइसनेच घूमत रहंय, जुबैदा, मंय अऊ कुछु दीगर माईलोगन मन घर घर जाके, परिवार मन ला समझायेंन के वो मन लइका मन ला सरकारी स्कूल मं भरती करवावेंय. वो बछर, करीबन 70 झिन लइका मन स्कूल जाय सुरु करिन अऊ वो मन ले कतको आज नउकरी करत हवंय,” वो ह सुरता करत बताथे.

अस्मिना खुदेच कभू स्कूल नइ गिस, फेर जब स्वयं-सहायता समूह के जरिया ले ओकर ले मिलेइय्या अफसर मन ये मन लेथें के वो ह पढ़े लिखे आय, त ओकर चेहरा मं उछाह भर जाथे. ओला जेन पहिचान अऊ मां मिउले हवय – जेन मं बरकत डहर ले लगाय अलग-अलग कतको प्रदर्सनी अऊ मेला मन मं प्रधानमंत्री अऊ मुख्यमंत्री ले मिले घलो सामिल हवय – ये ह ओकर बर एक ठन बड़े बात आय.

“लाल बत्ती लगे गाड़ी मन मोर घर के आगू खड़े होथें त जम्मो गाँव ह गरब करथे,” वो ह कहिथे. “अब त गाँव के पढ़े-लिखे लोगन मन घलो हमर काम मं जुरे ला चाहथें. पहिली वो मन कहंय के माईलोगन मन के घर ले निकरे गुनाह (दोस) आय.

ये सब्बो होय नइ रइतिस, गर अस्मिना ह अपन दाई ले चंगेरी बनाय के हुनर सीखे नइ रइतिस. अस्मिना अऊ जुबैदा, दूनोंच के चिंता हवय के काय ये दस्तकारी आगू बढ़त जाही. वो दूनों एके संग कहिथें, “आजकल के नोनी मन चंगेरी ला बस अपन दाई के चिन्हारी के रूप मं राखे ला चाहथें. अऊ एक दिन बस एक ठन चिन्हारी बनके रहि जाही.”

ये कहिनी मृणालिनी मुखर्जी फाउंडेशन (एमएमएफ ) के फेलोशिप के मदद ले लिखे गे हवय.